БИШКЕК, 12-апр. — Sputnik. Кара-Сууда жогорку окуу жайдын коронавируска шектелген кызматкеринин апасы каза болду. Бул туурасында Ош шаары жана Ноокат, Кара-Суу райондору боюнча коменданты Малик Нурдинов маалымат жыйында билдирди.
Белгилей кетсек, WhatsApp мессенджери аркылуу “Кара-Суу районунун Жар-Ооз айылында бир жигит Испаниядан келгенин жашырып койгон. Анда коронавирус болгондуктан апасына жугуп каза тааптыр” деген аудио тарап жаткан. Мындан улам Sputnik Кыргызстандын кабарчысы билдирүүнү тактоо үчүн комендантка суроо узатты.
Коменданттын айтымында, ал жогорку окуу жайлардын биринде жетекчилик кызматта иштейт. Испанияга окууга барып, 1-мартта кайтып келген.
“Учурда барып-келгенин жашырганбы, жокпу, иликтөө жүрүп жатат. Ал эми апасы каза болгону анык. Куран окутууга 120дай киши барган. Алардын баары анализ тапшырды. Тегерек четиндеги көчөлөр дезинфекциядан өттү. Тергөө иштерин улантып жатабыз, эгер ооруну жашырганы аныкталса, жоопкерчилиги каралат. Ал жигит азыр обсервацияда жатат. Анын коңшу көчөсүндөгүлөр кабатыр болбой эле койсо болот, бүт баары медицина жана укук коргоо органдарынын көзөмөлүнө алынды”, — деди Нурдинов.
Ошондой эле комендант ал толук айыгып чыкканга чейин укук коргоо органдары дистанттык түрдө байланышып турарын айтып, бет маңдай отуруп сурак жүргүзөт деп түшүнүп албоо керектигин белгиледи. Учурда аэропорттон качан келгени, жумушка качан барганы туурасында документтер алынууда.
Соңунда комендант ооруну жашыруу чыккынчылыкка барабар экенин эскертип, жок дегенде үй-бүлө, бала-чакасынын коопсуздугун ойлоп, кандайдыр бир шек жаралса дароо дарыгерлерге кайрылууга чакырды.
Коронавирустун кесепети
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилди. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилген.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
