БИШКЕК, 20-апр. — Sputnik. Дарыгерлер актриса Анастасия Заворотнюкту дарылоону жандантышты. Бейтаптын абалы жакшырууда. Бул тууралуу Sputnik радиосу ЖМКлардын билдирүүсүнө таянып кабарлады.
Маалыматка ылайык, акыркы айда актриса өзүн жакшы сезе баштаган.
"Заворотнюктун жолдошу Петр Чернышев күнү-түнү жубайынын жанында. Актриса менен клиникада чогуу жашап жатат. Заворотнюкту химиотерапияга башка клиникага, нейрохирургдарга алып барыш керек. Бул учурда жолдошу аны ары-бери ташууга жардамдашып, жанында болууда", — деп айтылат маалыматта.
Эске салсак, россиялык актриса жана алып баруучу Анастасия Заворотнюктун мээ рагына кабылганы тууралуу август айында билинген. Кийинчерээк дарыгерлер анын дарты айыккыс экенин айтышкан.
Ал эми 23-сентябрь күнү медиктер актрисаны дарылоону токтотуп, жүрөгүнүн согушун гана көзөмөлдөп жатышканы боюнча маалымат тараган.
