БИШКЕК, 25-апр. — Sputnik. Кыргызстандын өкмөтү Россиядагы мекендештерге жардам берүү максатында 10 миллион сом бөлөт. Бул тууралуу Кыргызстандын РФтеги элчилиги кабарлады.
Элчиликтин алдындагы штабга 25-апрелге карата төрт миллион сом каражат түшкөн. Маалым болгондой, мекендештерге акчалай жардам берүү каралган эмес.
"Түшкөн каражатты Москвадагы кыргыз диаспораларынын жетекчилери жана активисттерден турган атайын комиссия келген арыздарга жараша бөлүштүрөт”, — деп айтылат маалыматта.
Акча кыргызстандыктардын жатаканасынын акысын төлөөгө жана COVID-19 жуктуруп алган бейтаптардын, көп балалуу үй-бүлөлөрдүн, жалгыз бой аялдардын, кош бойлуулардын, оор илдети барлардын керектүү тамак-ашын алып берүүгө керектелет.
"Элчиликтин алдындагы штаб келген ар бир сом коомчулуктун көзөмөлүндө болорун билдирди”, — деди дипөкүлчүлүк.
Төмөнкү телефондор аркылуу консультация алса болот:
- +7 (499) 237-43-01;
- +7 (499) 237-44-61;
- +7 (925) 387-41-27;
- +7 (925) 387-45-97 (WhatsApp).
Россияда коронавирус жуктуруп алгандардын саны 68 миңден ашты. Илдеттен 5568 киши айыкса, 615и көз жумду.
