Бүгүнкү күндө Кыргызстанда коронавирустан айыгып кеткен медицина кызматкерлери бар. Алардын бири — Республикалык инфекциялык көзөмөлдөө илимий-практикалык борборунун врач-эпидемиологу Надира Соромбаева. Сакайган дарыгер бизге ачык айтып берүүгө макул болду.
"Катардагы эле иш күн болчу. Кадимки дегеним, январдын аягынан тарта эпидемиологдордун баары, алардын ичинде мен дагы коронавируска каршы күрөшкө тартылганбыз. Түнкү кезмет убагында кадимкидей эле телефон чалууларга жооп берип, кээде айрым адамдарга психологиялык колдоо көрсөтүүгө туура келип жаткан. Тынчсыздануу күч эле, андай абал азыр да уланууда.
Саламаттыкка кандай кам көрөрүмдү билген тааныштарым көпкө чейин буга ишене албай, кайра-кайра сурап жүрүштү. Бирок дарт тандабайт экен, ага сенин ким экениң, жаш-курагың да баары бир тура...
Илдеттин очогунда иштеген жокмун, түз байланышта нөөмөттө болуп, ченемдик документтер менен иштедим. Бирок иштин жагдайынан улам стационардагы бейтаптар менен байланышкан адамдар менен көп сүйлөшчүмүн.
Байланышкандардан жуктуруп алдым окшойт. Бетимди кармалап алсам керек, менимче, баарыбыз эле этибар албастан мурдубузду, көзүбүздү жүз жолу кармалап алышыбыз ыктымал. Айлакер вирус былжырлуу челге тез жабышып калат.
Ооруканага жаткырышты, эки апта дарыландым. Алгачкы үч күндө байкоо салышты. Ал эми алтынчы-жетинчи суткада инфекционисттер айтмакчы, "клиника" башталды.
Дене табым көтөрүлүп, башым ооруп, дем алуум оорлоп, энтиге баштадым. Абалымды жеңилдетиш үчүн кычкылтек менен дарылап жатышты, бул дем алуума жардам берди. Булар аз келгенсип, бактериялык инфекция чыкты. Пневмонияга өтүшүп кетпесин деп антибиотиктерди ичиришти.
Үч күн бою күчөтүлгөн дарылоо үзүрүн берип, абалым жеңилдей түштү. Ооруканада эки жума жаткан соң мени куландан соо кылып чыгарышты. Жаш баладай кубанганымды айтпагыла!
Үйгө чыкканымда гана ата-энемдин көңүлү жай алды, болбосо аябай сарсанаа болуп, түн уйкулары качкан. Жаш-курагынан улам алар үчүн аябай тынчсызданып жаттым, бул илдетти улгайып калгандар оор көтөрөт. Коронавирус жуктурганымды акырына чейин аларга айткым келген эмес. Бирок жашырыш кыйын экенин билесиздер да, анан калса, биз алар менен видео байланыш менен сүйлөшүп жатканбыз. Бешинчи күн дегенде кызымдан жана сиңдимден ата-энеме жолун таап кабарлоону сурандым. Кудай жалгап, баары жакшы бүттү
Эгерде оору жеңил өтсө, иммунитеттин бекемдигине ырахмат айтыш керек, кантсе да мен дайым сергек мүнөздө жашайм. Сасык тумоого чилдеде да кабылган эмесмин, кыштан жакшы чыктым деп ойлоп жүргөнүмчү!.. Стресс, өтө чарчаганым да таасир этти көрүнөт.
Клиницисттердин ишин "бешке" баалайт элем, жүз баллдык шкала боюнча толук жүзгө бааламакмын. Биздин адистер — азаматтар, муну бизге жакында келген чет элдик эксперттер да белгилешти. Алар биздин медициналык кызматкерлердин даярдыгына жакшы баа беришти.
Тилекке каршы, биздин эл көйгөйдү аңдап биле элек. Сак-саламат адамдар манжа санагына чыкпайт, ар бирибиздин бир жерибиз ооруйт.
Калк ден соолугуна жакшы карабайт, дегеле алдын ала дарыланбайт. Кыргызстандыктардын баарын саламаттыгына көңүл бурууга үндөйт элем: өтүнүч, карантиндин талаптарын сактаңыздар, медиктердин кеп-кеңешине кулак салыңыздар!
