Өзүбеков: өлкөнүн экотуризмди өнүктүрүүгө чоң мүмкүнчүлүгү бар
Келечектеги саякатчы ден соолугуна олуттуу көңүл бурган, спортко жакын, табиятты сүйгөн адам болот. Мындай туристтер үчүн Кыргызстан абдан туура келген өлкө. Мындай пикирин Мырзабек Өзүбеков Sputnik Кыргызстан радиосуна маек куруп жатып билдирди.
Анын айтымында, алдыдагы 4-5 жыл аралыгында саякатчылар фестиваль, ар түрдүү массалык туристтик иш-чаралардан качып калышат.
"COVID-19 туризм тармагында да жаңы бир этапты баштаганы турат десек болот. Анткени эми саякаттаганды сүйгөн адамдар массалык эмес, индивидуалдык туризмге басым жасашат. Аларды түрдүү оюн-зоокторду өткөрүү менен тартуу кыйынга турат. Келечектин саякатчысы ден соолугуна олуттуу мамиле жасаган, жаратылышты сүйгөн, спорт менен жакын мамиледеги адамдар болот. Мындай туристтер тоо-ташты аралап, Кыргызстан сыяктуу жерлерде эс алганды жактырышат. Биздин өлкө ушундан пайдаланып, азыртан аталган багытта анализ жүргүзүп, маркетингдик пландарды түзүп чыгып иштесе, экономикага сезилерлик киреше алып келгенден сырткары, бул тармакты мамлекеттин экономикасынын кирешелүү бөлүгүнө айландырып алууга болот", — деди Өзүбеков.
Адис учурда туризм тармагына мамлекет тарабынан конкреттүү жардам көрсөтүлбөй, жалпысынан эле бул багыт жакшы иликтенбей жаткандыгын кошумчалады.
