БИШКЕК, 10-май — Sputnik. Коронавирустун жайылып жатышынан шек санагандар далилдүү нерселерге таянып тыянак чыгаруулары керек. Бул туурасында саламаттык сактоо министринин орун басары Нурболот Үсөнбаев брифинг учурунда билдирди.
Андан модератор "коронавирус жок деп жаткандарга кандай пикириңизди айтасыз?" деп сураган.
"Эми мындай скептицизм (ишенбөөчүлүк менен кароо) дайыма болуп келген. Оору дүйнө жүзүн дүңгүрөтүүдө, эл жок нерсеге эле дүрбөлөңгө түшүп жаткан жок да. Оорулуулар бар, каза болгондор катталууда. Өзгөчө коркунучтуу жагдайларды көрүп жатабыз. "Коронавирус жок" деп айта бергенге кошулбайм. Далил менен айтышса жакшы болмок. Жөн эле отуруп алып жок дей берсе жок болуп кетпейт да. Жугуштуу оорулар ооруканасында ошончо бейтап жатат, дарылап жатабыз. Коронавирус жок болсо биз кантип башка шылтоо менен кармай бермек элек?" — деди министрдин орун басары.
Коронавирустун кесепети
Кыргызстанда коронавируска кабылгандардын саны 1002ге жетип, анын ичинен 675и айыгып чыкты. Тилекке каршы, 12 бейтап каза болуп калды.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
