БИШКЕК, 23-май — Sputnik. Кыргызстандагы коомдук транспорттор азырынча аймактарга каттабайт. Бул тууралуу коронавирус менен күрөшүү Республикалык штабдын жыйынында биринчи вице-премьер Кубатбек Боронов билдирди.
Анын айтымында, бет каптар, дезинфекциялоочу каражаттар жана жүргүнчүлөрдүн санына чектөө милдеттүү талаптарга кирет.
"25-майдан баштап коомдук транспорт жүрө баштайт. Мындай чечим жарандар жумушуна жетип алуу мүмкүнчүлүгүнө ээ болуусу үчүн кабыл алынды. Ошентсе да жергиликтүү бийлик, транспорттук компаниялар жана жарандар вирус жугуп калуу коркунучу жогорулашы мүмкүндүгүн билүүсү керек. Ошол себептен Саламаттык сактоо министрлиги тарабынан айтылган санитардык эрежелер толук сакталышы шарт. Ал эми аймактар аралык коомдук транспорттор азырынча жүрбөйт", — деди Боронов.
Штабдык жыйында боолголонуп жаткан күздө болчу коронавирустун экинчи толкунун алдын алуу максатында медициналык мекемелерди, медицина адистеринин потенциалын жогорулатуу, мобилдик лабораторияларды даярдап, атамекендик тест-системаларды жана жеке коргоочу каражаттарды өндүрүүгө шарт түзүү керектиги айтылды. Мындан тышкары калкты аталган мезгил аралыгында санитардык эрежелерди жана аралыкты сактоого даярдоо зарылчылдыгы белгиленди.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
