Белгилүү актёр, КРдин эмгек сиңирген артисти Марат Жантелиев менен Кыргыз ССРинин эл артисти Алиман Жангорозованын сүрөтү 1984-жылы Чүй облусундагы Кегети капчыгайында тартылган.
Ал жылы залкар режиссёр Төлөмүш Океев "Кожожаш" эпосунун негизинде "Ак илбирстин тукуму" тасмасын тарткан. Анын музыкасын композитор Муратбек Бегалиев, сценарийин драматург Мар Байжиев менен Төлөмүш Океев жазып, тасманын оператору Нуртай Борбиев болгон.
Ошол кезеңди тасмада Батманын ролун жараткан Кыргыз Республикасынын эмгек сиңирген артисти Калыйча Акматова мындайча эскерет:
"Биз ал кезде жаш болчубуз, Марат жаңы эле Москвадагы институтту бүтүп келип "Ак илбирстин тукумунда" чогуу иштешип калдык. Ал 22 жашында жинди Саяктын ролун аткарган. Чындыгында ал образ психологиялык жактан аябай оор болчу. Тасманы тартып жаткан учурда ал күлбөшү керек эле, бирок биз бери жактан туруп алып күлдүрүп, кээде гриммдерин бузуп койчубуз. Тоодо аба ырайы бузулуп бош болуп калганда жаштар тамашалашып, ырдап отуруп укмуш күндөрдү өткөргөн экенбиз. Жайында Ат-Башыдагы Босого жайлоосунда, күзүндө Чүйдөгү Кегети капчыгайында тартылып, баарыбыз бир туугандардай эле болуп калганбыз. Жашоодо Марат чымынга дагы зыяны жок, өтө боорукер, аябай баёо адам болчу. Аны эстеген сайын сөзсүз жакшы жактары көз алдыма келет, такыр таарынганды билчү эмес. Кийин театрда эмгектенип жүрүп да чай ичишип, катышып калдык. Кайтыш болуп калганын укканда кабыргам кайышты. Ал эми Алиман Жангорозова, Турсун Чокубаева эжелер менен ошондо бир боз үйдө чогуу жашап, алар менен чогу мейманга барып, алардын устукандарын ташып калдым. Себеби бизди чабандар күндө кечинде конокко чакырчу. Чындыгында алар кыйын инсандар болчу, биз азыр аларга окшошуп жатабызбы билбейм", — деди Акматова.
Аталган тасмага 200дөн ашык адам катышып, Догдурбек Кыдыралиев, Ашыр Чокубаев, Алиман Жангорозова, Досхан Жолжаксынов, Гүлнара Абдыкадырова, Калыйча Акматова, Айбек Кыдыралиев, Акыл Куланбаев, Светлана Чебодаева-Чаптыкова, Сакыбек Карабаев, Али Мухаммед, Раимбай Сеитов, Димаш Ахимов, Алексей Араштаев, Гүлсара Ажыбекова, Чоро Думанаев, Орозбек Кутманалиев, Асанбек Кыдырназаров өңдүү кыргыз, хакас, тажик, өзбек жана казак актёрлору роль жараткан.
"Ак илбирстин тукуму" кийинки жылы көрүүчүлөргө сунушталып, Берлинде эң абройлуу кинофестивалдардын биринде "Күмүш аюу", Дамаск шаарында "Күмүш кылыч" сыйлыгына татыган.
