БИШКЕК, 5-июл. — Sputnik. Бүгүн, 5-июлда, премьер-министр Кубатбек Боронов медицина кызматкерлерин кесиптик майрамы менен куттуктап, ыраазычылык билдирди. Бул тууралуу өкмөт башчынын маалымат кызматы кабарлады.
Боронов ак халат кийүү ардактуу жана сыймыктуу кесип болуп келгенин белгилеп, өлкөдөгү эпидемиологиялык кырдаал алардын жоопкерчилигин күчөткөнүн айткан.
"Коронавирустун жайылышына байланыштуу абал медицина кызматкерлерине көптөгөн жоопкерчиликти жана жүктү ыйгарды. Оорунун жайылышына жол бербөө боюнча жүргүзүлгөн чаралар саламаттык сактоо тутумунун мекемелеринин эскирген материалдык-техникалык базасына, кадрлардын аздыгына жана жетишсиз каржыланышына байланыштуу топтолгон көйгөйлөрүн ачыктады. Буга карабастан сиздер элге көмөк көрсөтүп жатасыздар", — деген Боронов.
Өкмөт башчы медиктер кызматтык милдетин аткарууда жакындарына убакыт бөлүүнү унутканын белгилеген.
Президент медиктерди Манас ордени, Даңк медалы менен сыйлады
"Сиздер үй-бүлөнү, жеке иштериңиздерди экинчи планга жылдырып, кооптуу инфекцияга каршы күрөштүн алдыңкы чегинде турасыздар. Бардык кыйынчылыктарга жана жоготууларга карабастан, өз жаныңыздарды аябастан жана жеке кызыкчылыктарды ойлобостон оор күндөрү элибизге жардам көрсөтүүнү улантып жатасыздар. Сиздерге терең таазим. Биз муну эч качан унутпайбыз!" — деген Боронов.
Премьер-министр ак халатчандарга чың ден соолук, бакыт-таалай, күч-кубат жана сабырдуулук каалап, өлкө ооруну биримдик менен жеңерин кошумчалаган.
