Апасынын жанына коюлду. Чубак ажынын сөөгү жерге берилди. Сүрөт, видео
Апасынын жанына коюлду. Чубак ажынын сөөгү жерге берилди. Сүрөт, видео
Sputnik Кыргызстан
Тажияга жети облустан келишти. Жергиликтүү кеңештин депутатынын айтымында, келгендердин баарына бет кап кийүү зарылдыгы эскертилип, социалдык аралык сакталган. 11.07.2020, Sputnik Кыргызстан
Тажияга жети облустан келишти. Жергиликтүү кеңештин депутатынын айтымында, келгендердин баарына бет кап кийүү зарылдыгы эскертилип, социалдык аралык сакталган.
БИШКЕК, 11-июл. — Sputnik. Кыргызстандын мурдагы муфтийи Чубак ажы Жалиловдун сөөгү өзүнүн туулуп өскөн айылы Базар-Коргон районундагы Бай-Мундуз айылында жерге берилди. Бул тууралуу тажияга катышкан Арсланбап айылдык кеңешинин депутаты Давлет Арзикулов Sputnik Кыргызстан агенттигине билдирди.
“Тажияга өлкөнүн булуң-бурчунан миңдеген киши келди. Айылдагы беш гектардай айдоо жерге жаназа окула турган жай даярдалган. Республиканын жети облусунан адамдар келип катышып жатат. Келгендердин баарына бет кап кийүү зарылдыгы эскертилип, социалдык аралык сакталды”, — деди Арзикулов.
Жаназа намазын Кыргызстан Ислам университетинин ректору, Чубак ажынын үзөңгүлөшү Абдышүкүр Нарматов окуду. Андан соң коргоочу кийим кийген адамдар табытты көтөрүп кетишти. Калың элге мүрзөгө барууга уруксат берилген жок.
Сөөк маркумдун жакын туугандары тарабынан жерге берилди.
Мурдагы муфтий 11-июлга оогон түнү оор абалда Бишкектеги Улуттук госпиталга жеткирилген. Саламаттыкты сактоо министрлиги билдиргендей, Чубак ажыга эки тараптуу пневмония өрчүп, дем жетишсиздигинин үчүнчү даражасы деген диагноз коюлган. Мындан сырткары, бейтап кант диабетинен да жабыркап келген. Тилекке каршы, реанимациялык аракеттерге карабастан саат 2.50дө каза болгон.
Чубак ажы Жалилов 1975-жылы 21-январда Базар-Коргон районунун Мундуз айылында мугалимдин үй-бүлөсүндө туулган. 1996-жылы Кыргызстандагы Ислам университетин бүтүргөн. Жусуп Баласагын атындагы Кыргыз улуттук университетинде араб тилинен сабак берген. 2000-2006-жылдары Сауд Аравиядагы Эл аралык "Умм ал-Кур" университетинде жогорку билим алган.
