БИШКЕК, 15-июл. — Sputnik. Өлкөнүн Спорт агенттиги алдыңкы атлеттер менен машыктыруучулардын COVID-19 инфекциясы менен ооруган же оорубаганын билүү үчүн анализ алдыртып жатат. Бул тууралуу аталган мекеме кабарлады.
Ага ылайык, изилдөө 13-июлдан тарта Бишкектеги Спорттук-реабилитациялык борбордо жүргүзүлүп жатат. Ага олимпиадалык спортту аркалагандар жана бул жааттагы улук машыктыруучулар катышууда.
"Антитела иммуноферменттик анализ (ИФА) ыкмасы менен аныкталып жатат. Лабораториялык изилдөөдө иммуноглобулиндин (антитела) эки түрү — IgM жана IgG аныкталат", — деп айтылат маалыматта.
Тест тапшыруучулардын атайын график жана тизме менен келип жатканы кошумчаланды. Алардын саны тууралуу маалымат берилген жок.
Биз болбосок ким?! Жетекчи спортчуларды COVID менен күрөшүүгө жардамга чакырды
Антитела — адамдын ооруп кайра сакайып кетишинен кабар берет.
Буга чейин Саламаттык сактоо министрлиги Бишкекте беш менчик лабораторияда ИФА (иммундук-ферменттик анализ) ыкмасы менен анализ алына баштаганын айткан болчу.
