БИШКЕК, 24-авг. — Sputnik. Мамлекет башчы Сооронбай Жээнбеков чек араны ачууда чет өлкөлөрдөгү эпидемиологиялык кырдаалды эске алуу керектигин, айрым жерлерде пандемия токтобой жатканын баса белгиледи.
Президенттин маалымат кызматы Жээнбеков өкмөт башчы Кубатбек Боронов менен онлайн кеңешме өткөргөнүн кабарлады. Анда өлкөдөгү эпидемиологиялык кырдаал, республиканын социалдык-экономикалык өнүгүүсү, тышкы чек аралардын ачылышы, күз-кыш мезгилине жана жаңы окуу жылына даярдыктар талкууланган.
Жээнбеков өлкө аймагында эпидемиологиялык кырдаалдын жакшырганына карабастан, Кыргызстандын жарандарын жеке тартипти жана бардык санитардык ченемдерди сактоо боюнча маалымдоо иштерин улантууга чакырган.
Боронов карантиндик чараларды бара-бара алып салууга карата көрүлүп жаткан даярдыктар, транспорттук байланыштарды паритеттик негизде жандандыруу боюнча чет мамлекеттер менен сүйлөшүүлөрдүн жүрүшү жөнүндө маалымат берген.
Премьер өлкө аэропорттору күнү-түнү жүргүнчүлөрдү санитардык-гигиеналык талаптарды сактоо менен тейлөөгө даяр экендигин кабарлаган. Анын маалыматына караганда, бардык керектүү шаймандар орнотулуп, тийиштүү алгоритмдер иштелип чыккан.
Миңдеген кыргызстандыктар Россия менен каттамдын ачылышын күтүп жатат
"Мамлекет башчы аймактарга иш сапарларынын жыйынтыгында финансы институттарынын, анын ичинде Россия-Кыргыз өнүктүрүү фондунун продукцияларын экспортко багыттаган ишканаларга жеңилдетилген насыяларды берүү боюнча ишин канааттануу менен белгиледи", — деп айтылган маалыматта.
"Санарип аймак" долбоорун жана "Түндүк" мекемелер аралык өз ара иштешүү электрондук системасына мамлекеттик органдарды интеграциялоо долбоорлорун ишке ашыруу үчүн көзөмөлдү күчөтүүгө көңүл бурган.
Жээнбеков өкмөттү мамлекеттик-жеке өнөктөштүктүн негизиндеги долбоорлор боюнча ишти активдештирүүнү айткан. Күз-кыш мезгилине карата даярдыктарды өз убагында көрүү, аймактардагы авариялык ооруканаларды жана мектептерди оңдоп-түзөөнү тезинен бүтүрүүнүн маанисин белгилеген.
