БИШКЕК, 26-авг. — Sputnik. Россиянын коронавируска каршы чыгарган "Спутник V" вакцинасын 27 өлкө алуу ниетин билдирди. Бул тууралуу РИА Новости Россиянын вице-премьери Татьяна Голиковага шилтеме берүү менен жазды.
Анын айтымында, вакцина алуу үчүн Беларусь, Азербайжан, Бразилия, Венесуэла, Казакстан жана башка мамлекеттер кайрылган.
"Биздеги маалымат боюнча, 27 өлкө үчүнчү фазадагы клиникалык изилдөөнүн жыйынтыгына тыкыр байкоо салып турат", — деп айткан Голикова президент Владимир Путиндин кеңешмесинде.
Өз кезегинде мамлекет башчы Беларусь биринчилердин болуп россиялык вакцинаны ала турганын билдирген.
COVID-19га каршы эмдөө: жаңы россиялык вакцина тууралуу кеңири кеп
Росссиянын ойлоп табуусу COVID-19дун алдын алуу үчүн чыгарылган дүйнөдөгү биринчи препарат катары катталып, "Спутник V" деген аталыш берилген. Аны Гамалея атындагы улуттук илим-изилдөө борборунун адистери Россиянын түз инвестициялар фондунун колдоосу менен иштеп чыккан. Эксперттердин айтымында, вакцинаны клиникалык сыноо иш-чарасына катышкандарда антителолор иштелип чыгып, препараттын коопсуз экендиги тастыкталган.
