БИШКЕК, 27-авг. — Sputnik. Билим берүү министрлиги жергиликтүү бийлик органдары менен биргеликте 1-класстын окуучуларынын мектепке барып-келүүсүн уюштуруу маселесин карап чыгуусу шарт. Бул тууралуу премьер-министр Кубатбек Боронов Республикалык штабдын жыйынында айтты.
Өкмөт башчы бул маселе өзгөчө шаарларга тийиштүү экенин белгилеп, мектептерде санитардык-гигиеналык нормалар так сакталышы керектигине токтолду.
"Тийиштүү санитардык коопсуздук нормалардын тыкыр сакталышын камсыздоого мектеп жетекчилиги жооптуу. Коомдук транспортто илдеттин жугуу тобокелчилиги жогору экенин эске алып, Билим берүү министрлиги жергиликтүү бийлик органдары менен биргеликте 1-класстын окуучуларынын мектепке барып-келүүсүн уюштуруу маселесин карап чыгуусу шарт. Бул маселе өзгөчө шаарларга тийиштүү", — деди Боронов.
Штабдын чечимине ылайык, жаңы окуу жылында 1-класстын окуучулары мектепке барып окушат. Калган класстын окуучулары, орто жана жогорку окуу жайлардын студенттери онлайн режиминде билим алат. Эпидемиологиялык кырдаалга жараша билим алуунун кийинки тартиби Республикалык штабдын отурумдарында каралып турмакчы.
Бул жылы окуучулардын формасы кандай болот? Министрдин жообу
Өкмөт башчы аз камсыз болгон үй-бүлөлөрдүн балдарынын аралыктан билим алуусуна шарт түзүү үчүн сыналгы жана уюлдук телефон менен камсыздоо маселесин чечүү керектигин кошумчалады.
Мындан тышкары, коомдук транспортто санитардык-гигиеналык талаптардын сакталышын туруктуу негизде көзөмөлдөө зарылдыгы айтылды.
