БИШКЕК, 2-окт. — Sputnik. Кыргызстан Венгрия мамлекетинин тиешелүү органдары менен финансылык башкарууну жакшыртуу боюнча тажрыйба алмашат. Бул тууралуу президент Сооронбай Жээнбековдун аталган мамлекетке болгон иш сапары учурунда макулдашуулар болгонун Финансы министрлигинен билдиришти.
Тагыраагы, "Кыргыз Республикасынын Финансы министрлиги менен Венгриянын Финансы министрлигинин ортосундагы өз ара түшүнүшүү жана кызматташтык жөнүндө меморандумга" кол коюлду. Анда тараптар финансыны натыйжалуу башкаруу жаатында кызматташуу ниетин билдиришкен.
Жээнбеков менен Орбан Бишкек — Будапешт авиакаттамын ачууга макулдашты
Эки өлкөнүн адистери төмөнкү багыттар боюнча маалымат жана тажрыйба алмашары айтылат:
- мамлекеттик финансыны натыйжалуу башкаруу;
- бюджеттик, фискалдык жана инвестициялык саясат боюнча улуттук мыйзамдар;
- республикалык бюджетти түзүү жана аткаруу;
- кассалык каражаттарды финансылык болжолдоо жана башкаруу;
- мамлекеттик кирешелерди болжолдоо;
- ички аудитти контролдоо жана баалоо;
- бюджеттин чыгашалары: даректүүлүк жана натыйжалуулук;
- жергиликтүү бюджеттерди тейлөөнүн методологиясы жана технологиясы;
- мамлекеттик инвестициялар саясатын жүргүзүү;
- эл аралык финансылык уюмдар менен кызматташуу боюнча тажрыйба алмашуу;
- бюджеттик эсеп жана отчёттуулук;
- бюджет системасындагы маалыматтык технологиялар.
Ошондой эле документте КР Финансы министрлигине техникалык жана консультациялык жардам берүү маселеси каралган.
Жээнбеков Будапешттеги ажайып имараттардын бирин көрүп чыкты. Сүрөт
Эске салсак, президент Жээнбеков 28-сентябрда Венгриянын премьер-министри Виктор Орбандын чакыруусу менен аталган өлкөгө жооп катары жасалган сапары менен барган.
Мамлекет башчы иш сапар кыргыз-венгер кызматташтыгын жакшы деңгээлге көтөрүп, алаканы күчөтөрүн белгилеген.
