БИШКЕК, 17-ноя. — Sputnik. Бишкек, Ош жана Нарын облустарындагы чоң ооруканаларга Азия өнүктүрүү банкы менен ЮНИСЕФ 20 кычкылтек концентраторун, 20 кычкылтек бөлүштүргүч жана 27 пулсьсоксиметр алып берди. Бул туурасында Саламаттык сактоо министрлиги билдирди.
Глобалдык пандемия шартында дүйнө боюнча COVID-19га чалдыкан бейтаптарды кароодо кычкылтек концентратору менен пульсоксиметр колдонула баштады. Ал эми кычкылтек бөлүштүргүч — бир концентратордогу кылчкылтекти бир нече бейтапка бөлүп жеткирет.
Медициналык жабдыктар Азия өнүктүрүү банкынын ЮНИСЕФ аркылуу Кыргызстанга медициналык жардам көрсөтүү долбоорунун алкагында бөлүнгөн 200 миң доллардын эсебинен алынган.
Аталган долбоор менен апрель айынан бери үч жасалма дем алдыруучу аппарат, 20 миң медициналык кол кап, 2000 коргоочу кийим, 2300 FFP2 классындагы респиратор, 1500 дем алдыруучу система жана башка каражаттар алынган.
