БИШКЕК, 9-дек. — Sputnik. Туриндик "Ювентус" каталондук "Барселона" клубун 3:0 эсебинде утту, эки голду Криштиану Роналду киргизген. Командалар УЕФАнын Чемпиондор лигасы мелдешинин тайпалык этабынын алтынчы турунда кезиккенин Р-Спорт жазды.
G тобундагы беттеш кечээ испандыктардын "Камп Ноу" стадионунда өткөн. Оюндун 13-мүнөтүндө Роналду пенальтиден эсепти ачып, 52-мүнөттө экинчи ирет дагы пенальтиден гол киргизди. Дагы бир голду туриндиктерден Уэстон Маккенни (20-мүнөт) кошту.
Эки команда тең 15 упайдан топтоп, мелдештин плей-офф баскычына чыгышты. Өз ара беттештеги артыкчылыктан улам "Ювентус" тайпадан биринчи орунду ээледи.
Кошумчалай кетсек, эзелтеден атаандашып келген Месси менен Роналду бири-бирине каршы 36 ирет беттешке чыгышкан. Аргентиналык футболчу командасы менен 16 ирет жеңишке жетип, 22 топ киргизсе, португалиялык атаандашы 10 жолу утуп, 20 гол тепкен.
