БИШКЕК, 6-авг. — Sputnik. Президент Садыр Жапаров бүгүн Түркмөнбашы шаарында Борбор Азия мамлекет башчыларынын консультативдик жолугушуусуна катышуунун алкагында Түркмөнстандын президенти Гурбангулы Бердымухамедов менен жолугушту.
Анда эки тараптуу кызматташуунун кеңири чөйрөсүндөгү маселелерди, анын ичинде соода-экономикалык байланыштар, Түркмөнстандан Кыргызстанга жаратылыш газы менен электр энергиясын импорттоо, туризмди өнүктүрүү жана башка маселелерди талкуулашты.
Ал эми Бердымухамедов кылдат, натыйжалуу жолугушуулар менен сүйлөшүүлөр кызматташуунун келечектүү багыттары мерчемделген расмий сапардын жыйынтыгын канааттануу менен белгилегени айтылды.
Соңунда эки өлкөнүн лидерлери мындан ары өз ара кызматташуу боюнча биргелешкен пландарды белгилеп, ар кыл тармакта кызматташтыкты тереңдетүүгө даяр экендигин билдиришти.
Эске салсак, учурда президент Садыр Жапаров Түркмөнстанда Борбор Азия мамлекет башчыларынын консультативдик жолугушуусуна катышууда. Анда Борбор Азия өлкөлөрүнүн лидерлери соода-экономика, энергетика, транспорт-коммуникация чөйрөлөрүндөгү региондук кызматташтык маселелерин, ошондой эле коронавирус пандемиясына каршы күрөшүүдө биргелешкен чараларды талкуулашат.
