БИШКЕК, 6-авг. — Sputnik. Нөшөрлөп жааган жамгырдан улам Жалал-Абад облусундагы айылдардын биринин жолу дарыяга айланды. Бул тууралуу окурман билдирип, видео жиберди.
Кадрдан чындап эле сел жолду жууп кеткенин жана анын агымы дарыяны элестетерин көрүүгө болот.
"Саат 19:00дө жамгыр катуу жаай баштады. Ал эми 19:24тө сел жүрдү. Окуя Аксы районуна караштуу Кызыл-Жар айылында болду", — деп жазды окурман.
Эске салсак, буга чейин Кыргызгидромет шашылыш билдирүү тараткан. Ага ылайык, 6-8-август аралыгында толуу аймактарда жаан катуу жаап, сел жүрүү кооптуулугу бар.
