Коңшу өлкөлөргө салыштырмалуу өлкөдө спортко бөлүнгөн бюджет абдан аз. Ага карабастан кыргызстандык спортчулар эл аралык мелдештерде байгелүү кайтып жатышат. Бул тууралуу Канатбек Арпачиев Sputnik Кыргызстан радиосунун эфиринде маек куруп жатып билдирди.
Арпачиев: бизде спортко бөлүнгөн акчаны Казакстан бир районуна сарптайт
Анын айтымында, спортко бөлүнгөн каражатты эффективдүү иштетип, туура жумшоо керек.
"Кыргызстанда спортко бөлүнгөн каражат жетишсиз. 1994-жылы мамлекеттик агенттиктин бюджети 56 миллион сомдой болчу. Пекин Олимпиадасында бул көрсөткүч 78 миллион сомго чейин жеткен. "Эки жыл мурун бир миллиард сомдон ашты" деп айтканыбыз менен анын 460 миллион сому машыктыруучулардын, спорт мектептеринин мугалимдеринин айлык акысына жумшалса, чоң спортко 200 миллиондун тегерегиндеги сумма кетет. Ал эми олимпиадалык спорттун түрлөрүн камсыз кылуу үчүн 115 миллионго чейинки сумма берилип жүрөт. Бул башка мамлекеттерге салыштырмалуу өтө аз. Алсак, өлкөнүн спортуна бөлүнгөн бюджет Казакстандын бир районунун спорттук тармагына бөлүнгөн акчага тете. Эгер бөлүнгөн каражатты эффективдүү иштетип туура жумшаса, өзгөрүүлөр байкалат. Мындаш тышкары, акча убагында бөлүнбөйт. Мелдештерге командалар карызга барып, кийин төлөп жүрүшөт", — деди Арпачиев.
Ошондой эле адис ар бир адам өзүнүн саламаттыгына көңүл буруп, дене тарбия жана спорт менен машыкса мамлекетке чоң салым кошорун баса белгиледи.
Подкасттын толук вариантын видеодон көрүңүз:
