Олимпиада оюндары Япониянын баш калаасында 23-июлда башталып, 8-августта аяктады. Уткан медалдардын саны боюнча АКШ биринчи орунга чыкты. Америкалык спортчулар 39 алтын, 41 күмүш жана 33 коло байгеге ээ болушту. Кытай өлкөсү экинчи, ал эми Япония үчүнчү орунду ээледи. Россия 20 алтын, 28 күмүш жана 23 коло медалы менен алдыңкы бештикке кирди.
Мелдештин жабылыш салтанаты көрүүчүлөрү жок өттү. Ачылыш аземи да бош стадиондо болгон. Адегенде Олимп оюндарынын катышуучуларынын парады өтүп, япондордун салтына ылайык атлеттер көзү өткөндөргө, анын ичинде спортчулардын элесине таазим кылышты.
Аземдин соңунда Токио эстафетаны салтанаттуу түрдө 2024-жылдагы Олимпиада оюндарынын уюштуруучусу Парижге өткөрүп берди. Эл аралык олимпиада комитетинин президенти Томас Бах олимпиадалык тууну Париждин мэрине тапшырып, Франциянын гимни "Марсельеза" жаңырды.
