БИШКЕК, 11-Авг. — Sputnik. Бишкек шаарынын инфраструктурасын жакшыртуу жана коомдук коопсуздукту камсыз кылуу максатында №21 жана №47 түзөтүү колонияларын шаардын сыртына көчүрүү маселеси каралып жатат. Бул тууралуу Жаза аткаруу мамлекеттик кызматынын жетекчиси Аскат Эгембердиевди президент Садыр Жапаров кабыл алган маалда кабарлады.
Өлкө башчынын маалымат кызматы тараткан билдирүүдө жолугушуу бүгүн болгону белгиленген.
Жолугушуунун жүрүшүндө Эгембердиев республиканын жазык-аткаруу системасында (КР ЖАС) жүргүзүлгөн реформалар, санариптештирүүнүн жыйынтыгы тууралуу маалымат берип, пенитенциардык системаны каржылоо жөнүндө, ошондой эле КР ЖАС органдары менен мекемелериндеги эпидемиологиялык кырдаал жана коронавирус инфекциясына каршы күрөшүү чаралары тууралуу маалыматты ортого салды.
Ошону менен бирге ал бүгүнкү күндө ЖАМК системасындагы бир катар көйгөйлөрдү, атап айтканда, түзөтүү мекемелеринин инфраструктурасынын жана материалдык-техникалык базасынын эскилиги жеткенин белгиледи.
ЖАМК төрагасы учурда Бишкек шаарынын инфраструктурасын жакшыртуу жана коомдук коопсуздукту камсыз кылуу максатында №21 жана №47 түзөтүү мекемелерин шаардын сыртына көчүрүү маселеси каралып жатканын билдирди.
"Президент Жапаров Жаза аткаруу мамлекеттик кызматы көп жылдардан бери пенитенциардык мекемелерде укуктук тартип менен мыйзамдуулукту камсыз кылуу боюнча жүктөлгөн милдеттерин татыктуу аткарып келе жатканын баса белгиледи. Анткен менен бул системада жылдар бою топтолуп келген көптөгөн чечилбеген көйгөйлөр бар экени кошумчаланды", — деп айтылат билдирүүдө.
Президент Жапаров ЖАМК жетекчилигине жаза аткаруу кызматынын өздүк курамынын ичинде кызматтык тартипти чыңдоо, кесиптик даярдык деңгээлин жогорулатуу, ошондой эле коррупциялык көрүнүштөр жана кызмат абалын кыянатчылык менен колдонуу фактыларын алдын алуу иштерин күчөтүү милдетин койду.
