Өрт жана суу апааты. Глобалдуу ысыктын кесепетин чагылдырган 15 сүрөт

БУУнун Климаттын өзгөрүүсү боюнча өкмөттөр аралык тобу глобалдык жылуулук боюнча кезектеги отчётун жарыялады. Анда окумуштуулар күндүн ысышы тездик менен өсүп жаткандыгын, 2030-жылы жер жүзүндө абанын температурасы жогорку чегинен дагы 1,5-2 градуска ысык болору айтылды. Адистердин белгилешинче, глобалдуу ысык бүт дүйнөгө кедергисин тийгизип, аны туруксуз абалга кептейт. Климаттык өзгөрүүлөр жаан-чачынды көбөйтүп, андан улам суу ташкындары пайда болот. Көптөгөн аймактарды кургакчылык каптап, ал эми жээкке жакын жерлерде деңиздеги суунун деңгээли көтөрүлөт.

Окумуштуулар соңку жумаларда эле дүйнө жүзүндө аба ырайында кескин өзгөрүүлөр болгонун эскертишкен. Европа, Кытай жана Индияны суу каптап, ал эми АКШ, Канада, Греция жана Түркияда токойлор өрттөнүп, жалын улам күч алууда. Планетада акыркы 50 жылда абанын табы улам жогорулап, соңку жылдары рекорддук көрсөткүчкө жетти. 2021-жылдын 11-августунда Сицилияда абанын температурасы 48,8 градус болду. Бул көрсөткүч жалпы европалык рекордду басып өттү. Дүйнөлүк метеорологиялык уюмдун маалыматына ылайык, буга чейинки рекорд 1977-жылы июль айында Афиныда катталган. Анда абанын табы 48 градуска чыккан.

Окумуштуулардын айтымында, дүйнөдө абанын табы дагы 1,5 градуска жогоруласа Тынч океанындагы айрым арал мамлекеттер үчүн кыйратуучу сокку болот. Бул чөлкөмдөгү өлкөлөр көптөн бери деңиз толкундарынан, күчтүү циклондордон, узакка созулган кургакчылыктан жана айыл чарбасына зыян келтирүүчү жер астындагы суулардын туздалуусунан жапа чегип келишет. Мындан сырткары, Тынч океанда суунун деңгээли жогорулап, көпчүлүк аралдар суу астында калууда. Жер планетасын ысык аба ырайы каптаганда дал ушундай катаклизмдер көбөйө баштайт.