БИШКЕК, 24-сен. — Sputnik. Бириккен күрөш дүйнөсү (United World Wrestling) уюму спорттук күрөш боюнча дүйнө чемпионатына 8 күн калганын эске салган ролик чыгарып, ага кыргызстандык чемпион Айсулуу Тыныбекованын финалда уткан беттешинин видеосун койду. Роликти дүйнөлүк уюм өзүнүн социалдык тармактардагы баракчаларына жарыялады.
Посмотреть эту публикацию в Instagram
Анда Тыныбекова 2019-жылы финалдык беттештин акыркы секундаларында упай алып, жеңишти илип кеткен учуру көрсөтүлгөн.
"Айсулуу Тыныбекова 2019-жылдагы дүйнө биринчилигинин 62 килограмм салмактын финалында ошол кездеги чемпион Тайбе Юсеин менен кармашып, акыркы секундаларда жерге жыгып, Кыргызстандын атынан алгачкы дүйнө чемпиону болгон", — деп жазылган постто.
Кыз-келиндер мелдеши 4-октябрда башталат. Биринчилерден болуп учурдагы дүйнө чемпиону Айсулуу Тыныбекова ошол күнү килемге чыгат.
Тыныбекова бул мелдеште чемпиондук наамын коргоо үчүн таймашат. Мындан сырткары, Кыргызстандын кыз-келиндер курама командасынан Токио Олимпиадасынын коло байге ээси Мээрим Жуманазарова (68 килограмм) жана Токио Олимпиадасынын катышуучусу Айпери Медет кызы (76 килограмм) катышат.
