Мелис Убукеев, Болот Шамшиев, Клара Юсупжанованын жаш кези. Таберик сүрөт
Жазылуу
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Sputnik / Александр Федоров
Жаш кинорежиссерлор Мелис Убукеев, Болот Шамшиев жана Клара Юсупжанованын сүрөтү 1963-жылы Фрунзе шаарында тартылган.
Ал жылы киночу Лариса Шепитьконун "Аптап" тасмасы көрүүчүлөргө сунушталып, башкы каарман Кемелдин ролун аткарган Шамшиев менен Калипаны ойногон Юсупжанова сыйлыкка татыган. Аларды Убукеев куттуктаганы барган.
Замандаштары менен ал кезди кинорежиссер Төлөгөн Сыдыков мындайча эскерет:
"Кыргызстанда башында элдин жытын, сөздүн даамын билбеген сырттан келген киночулар иштеп жүрүштү. Алар жакшы тасмаларды тартышты, бирок темаларын толук ачып бере алган жок. Ошол жылдары Болот Шамшиев, Клара Юсупжанова Шепитьконун "Аптап" кинокартинасы өңдүү фильмдерге катышып өздөрүн чоң киного даярдашкан. Фрунзедеги киночулардын ишин көргөнү көчөдөгү балдар чогулуп алып барып, бери жактан карап турчубуз. Кийин Болот "Чабан", "Манасчы" "Караш-Караш окуясын", Төлөмүш "Жылкылар", "Бакайдын жайытын", Мелис Убукеев "Тайгак кечүү", "Акмөөрдү", Геннадий Базаров "Саманчынын жолун" тартышты. Ошол жаштардын катарында сценарист Кадыр Өмүркулов, оператор Кадыржан Кыдыралиев да бар эле. Анда алар кыргыздын этнографиясын, турмушун мыкты билген 22-23 жаштагы эле балдар болчу", — деди Сыдыков.
Сүрөттөгү Кыргыз мамлекеттик университетинин тарых факультетинин бүтүрүүчүсү Мелис Убукеев 28, Москвадагы Бүткүл союздук кинематография институтунун режиссёрдук факультетинин студенти Болот Шамшиев 22, Ташкенттеги Островский атындагы мамлекеттик театр өнөрү институтунда окуган Клара Юсупжанова 23 жашта эле.
Тема боюнча:
