Быйыл 47 миӊден ашуун абитуриент ЖРТга катышат
© Sputnik / Асель Сыдыкова
Жазылуу
Билимди баалоо жана окутуу усулдары борборунун директору Чынара Батракеева 2023-жылы Жалпы республикалык тестирлөө 20-майда башталарын айтты.
2023-жылы Жалпы республикалык тестирлөөгө катышуу үчүн 47 миӊ 400дөн ашуун абитуриент катталды. Бул тууралуу Чынара Батракеева Sputnik Кыргызстан радиосунун эфиринде маек куруп жатып билдирди.
Быйыл 47 миӊден ашуун абитуриент ЖРТга катышат
Анын айтымында, бул жылы республика боюнча 117 тестирлөө борбору уюштурулат.
"Жалпы республикалык тестирлөөнүн I этабы 20-21-майда (19-май – тест-борборлорду даярдоо күнү), II этабы 23-24-май күндөрү (22-май – тест-борборлорду даярдоо күнү), ал эми III этабы 23, 24-июнь — жүйөлүү себептер менен тест тапшырбай калгандар үчүн мөөнөтүнөн кийинкиге калтырылган тестирлөө (22-июнь – тест-борборлорду даярдоо күнү) өткөрүлөт. Ошондой эле каттоого жетишпей калган абитуриенттер үчүн 19, 22-май жана 22-июнь күндөрү тест-борборлордо кошумча каттоо жүргүзүлөт. Тестирлөө учурунда катышуучунун столунда өздүгүн тастыктаган документ, тесттен өтүүгө уруксат берген талон, көк же кара калем, тест китеби, жооп баракчасы жана черновик гана болушу шарт. Уюлдук телефон, калькулятор, калькулятору бар саат, фотоаппарат, кулакчын жана башка электрондук шаймандарды же байланыш түзүүчү каражаттарды тест учурунда же тыныгуу учурунда, алар иштебесе же катышуучу колдонууга ниети жок болсо да жанында кармоого тыюу салынат. Эреже бузгандар дароо четтетилет. Тестирлөө мезгилинде көчүрүүгө же көчүртүүгө аракет кылган балдарга эскертүү берилип, болбосо тесттен чыгарылат", — деди Батракеева.
Ал ЖРТдан өткөн бардык абитуриенттер тестке жооп бергенине жараша гана упай аларын, аны башка жол менен алуу же көбөйтүү мүмкүн эмес экенин эскертип, туура жооптор белгиленген баракча сатам деген шылуундарга ишенбөөгө чакырды.
