БИШКЕК, 16-июн. — Sputnik. Нарындын Ат-Башысында 28-29 июнда салтка айланып калган кыргыз шырдагынын VII фестивалы өтөт. Бул туурасында Маданият, маалымат жана туризм министрлигинен кабарлашты.
Уюштуруучулар иш-чаранын максаты кыргыз элинин кол өнөрчүлүгү боюнча мурастарын, кийиз жасоо өнөрүн сактап калуу, уздарды колдоо экендигин айтты.
"Фестиваль өткөн аянтта кийиз буюмдарын жасоо, улуттук тамак-аш даярдоо боюнча мастер-класстар өтө. Андан сырткары, "Арууке", "Ак-Муз айымдары", "Арашан", "Казыбек айымдары" деп аталган жергиликтүү чыгармачыл топтор концерттик программасын тартуулайт", — деп айтылат маалыматта.
"Кыргыз шырдагы" долбоору 2009-жылдан тарта иштеп келет. Уюштуруучулар бул иш-чара менен аймактын экономикалык абалын жакшыртуу, туристтерди тартуу максатын да көздөгөн.
