БИШКЕК, 9-авг. — Sputnik. World Next Top Model 2017 сулуулук сынагына Кыргызстандын атынан барган Сусанна Егорян финалда Армениянын аты жазылган лента менен чыкты. Бул көрүнүштү конкурстун акыркы бөлүгүндө тартылган сүрөт да тастыктап турат.
Улуту армян болгон Сусанна конкурста биринчи вице-мисс титулун алган.
Аталган сулуулук конкурсу 14-июлдан 5-августка чейин Ливандын борбору Бейрут шаарында өткөн. Анын финалдык бөлүгү 6-августта болгон. Дүйнө сулуусу аталуу жана 5 миң долларлык байге үчүн 49 мамлекеттен келген кыз ат салышкан. Бардык турлардын жыйынтыгы менен World Next Top Model титулу Индиядан келген Шерил Чарлезге буюрган. Биринчи вице-мисс Кыргызстандан барган Сусанна Егорян, экинчи вице-мисс деп Мароккодон келген Далале Газзали аталды.
Егорян World Next Top Model 2017 конкурсуна катышуу укугун "Кыргызстан сулуусу — 2017" улуттук конкурсунда "Подиум сулуусу" титулун жеңгенден кийин алган.
Sputnik Кыргызстан агенттиги аталган конкурска Егорянды жиберүү аракетин көргөн Таттыбүбү Самидин кызы менен байланышканда ал окуя тууралуу оюн билди.
Ал уюштуруучулар мындай нерсенин орун алышына уруксат бербеши керектигин айтты.
"Мен буга ишене албай турам. Уюштуруучулар ката кетирген, же Сусанна өзү ушундай чечим кабыл алышы мүмкүн деген божомолум гана бар. Бул анын жеке чечими болгон күндө дагы уюштуруучулар мындайга жол бербеши керек болчу", — деди Таттыбүбү Самидин кызы.
Sputnik агенттигинин конкурстун уюштуруучулары жана Сусаннанын өзү менен байланышуу аракетинен майнап чыккан жок. Ошол эле учурда сулуулук мелдешинин расмий сайтында Сусанна Егорян Кыргызстандын атынан катышкан деп жазылып турат.
18 жаштагы Сусанна жаш модель. Ал Бишкектеги №8 мектепти аяктаган.
