Стрит-арт (англ. street art — көчө искусствосу) — урбанисттик стилдеги көркөм сүрөт чеберчилиги. Граффити стрит-арттын бир бөлүгү болуп эсептелет. Анын келип чыгыш башаты тээ 1918-жылдар, Маяковскийдин ысымы менен байланышкан. Россиянын футуристтеринин декретинин бир пунктунда акын мындай деген:
"Көчөлөр менен аянттарда кайталангыс түстөрү кубулган сүрөттөр үйдөн үйгө өтүп, ары-бери өткөндөрдүн көз жоосун алып, кубандырып турсун. Сүрөтчүлөр боёкторун колго алып өз чеберчилиги менен шаарлардын, вокзалдардын жана тынымсыз ары-бери чабыттап жүрчү темир жол вагондорунун бардык капталдарын, маңдайлары менен боорлорун кооздоп, сүрөткө толтурууга милдеттүү".
Граффити азыркы көрүнүшүндө ХХ кылымдын 50-жылдарында АКШда жаралган, ал эми 80-жылдарда болсо вандализм эмес, көркөм сүрөт искусствосу катары расмий тааныла баштаган.
Стрит-артта башкы максат – көрүүчүнү өзүнө тартып, ойлондуруу жана жакшы маанай тартуулоо.
