БИШКЕК, 15-июнь — Sputnik. Никара Бьюэлл Бишкектен Тбилисиге бир нече жыл мурун көчүп кеткен. 14-июнга караган түнү ал үч баласын уктатып коюп, күйөөсүн күтүп отурган. Ал түн ортосуна чейин иштемек, бирок кайсы бир сезим аны үйгө эртерээк кетүүгө мажбур кылган. Грузиянын борборуна нөшөрлөп жааган жаан алгач жубайларды кубантты – күндүн ысыгынан кийин аба салкын тартып, тазарып калды.
"Үйдөн чыгууга болбойт деп бардык жаңылыктардан берип жатышты. Бирок мага эскертүүнүн кереги жок болчу – сыртка чыгуу чынында эле коркунучтуу көрүндү", — деп Никара башынан өткөн окуя менен бөлүштү.
Бирок баарынан көп үрөй учурганы Тбилисинин зоопаркынан чыгып кеткен жырткычтар болгон. Зоопарк Бьюэллдердин үйүнөн бир-эки көчө алыс жайгашкан. Никаранын айтымында, дагы 20дан ашык жырткыч жаныбар эркиндикте жүрөт. Ошондуктан тамак-аш алганы дүкөнгө тобокелдик менен барууга туура келүүдө.
"Тбилисиликтер бул жаныбарлар үчүн боору ачыйт. Биринчи алар табыяттын кырсыгынан качканга аргасыз болушса, эми атайын кызматтардан коркуп атышат. Эмнеге жетиштүү санда транквилизатор табылган жок, түшүнүксүз. Жаныбарларды сөзсүз эле өлтүрүш керек эмес эле да. Биз балдар менен бир жума мурун эле барып, ал жаныбарларды көрүп суктанган элек, эми аларды мыкаачылык менен өлтүрүп салышты", — дейт Никара.
Анын айтымында, азыр коңшу үйдүн тургундарын көчүрүп жатышат. Суу имараттын фундаментин жууп кеткен, ошон үчүн ал каалаган убакта кулап калышы ыктымыл. Мындай абалдагы имараттар Тбилисиде ондоп саналат.
Ошентсе да, экологиялык кырсыкка жол берилген жок. Дүкөндөр иштей баштады. Ири соода түйүндөрү жабыр тарткандарды акысыз тамак-аш жана суу менен камсыз кылууда деп билдирди Никара.
