БИШКЕК, 26-июнь — Sputnik. Ысык-Көл облусунда эки күндүн ичинде 40 тонна жапайы өскөн кара куурай жок кылынганын облустук ИИБ билдирди.
Аталган облустун үч районунда 25-26-июнь күндөрү жапайы кара куурайды жок кылуу боюнча ишембиликтер өттү. Иш-чара баңгизатка каршы күрөшүү эл аралык күнүнө карата жыл сайын өтүүчү "Мак-2015" операциясынын алкагында ишке ашты.
ОИИБнын маалыматы боюнча, бул жылы 222 миң гектар жер текшерилип, анын 548 гектарында кара куурай өсөөрү аныкталган. Ак-Суу, Түп, Жети-Өгүз райондорунда жалпы жонунан 14 гектарлык аймактан 39 тонна 173 кг кара куурай жок кылынды.
"Ишембиликте милиция кызматкерлери, атайы бригадалардын мүчөлөрү, жумушсуз катары каттоодо турган жарандар катышты. Биз аларга жасаган иши боюнча акча төлөп беребиз", — дейт облустук ИИБ маалымат катчысы Сталбек Усубакунов.
"Мак-2015" операциясы түшүм жыйнала турган август айына чейин уланат. Усубакуновдун маалыматы боюнча бул жылы облуста баңгизатка байланышкан 111 кылмыш иши катталган.
"Кара куурайды жок кылуу боюнча калк арасында түшүндүрүү, бул аракеттерге элди тартуу иштерин айыл өкмөттөрүнүн жетекчилери жүргүзүшү керек. Биз жыл сайын бардык айыл аймактарын текшерүүдөн өткөрөбүз. Натыйжада аталган чөптү жок кылууга эч кандай чара көрбөгөн жетекчилерге карата 21 протокол түзүлдү. Бардык айыл өкмөттөр айып пул төлөштү", — деп кошумчалады Усубакунов.
Нашаа жана марихуна заттарын пайдалануу, сактоо жана сатуу үчүн 5 миң сом өлчөмүндөгү айып пулдан баштап мүлк конфискациясы менен бирге эки жылдан 20 жылга чейин эркинен ажыратуу жазасы каралган.
