БИШКЕК, 15-июль — Sputnik. Өздөрүн "патриотторбуз" деп тааныштырган балдардын ур-токмогуна кабылган кыз Россияда изделип жатканын ИИМдин маалымат кызматы билдирди.
Июнь айынын башында топтолгон балдардын ур-токмогуна калган жылаңачталган кыргыз кыздын видеосу социалдык түйүндөрдө жарыяланган.
Укук коргоо органдарынын маалыматына ылайык, аталган видео токойдо тартылган. Видеодо өздөрүн "патриотторбуз" деген балдардын тобу жылаңачталган кызды ортого алып, аны башка улуттун өкүлдөрү менен интимдик катнашка барганын айтып сабап жатканы тартылган.
КР ИИМдин Россиядагы өкүлчүлүгү тарабынан алдын ала иштер жүргүзүлүп, "патриоттордун" кордугуна кабылган кыз Кыргызстандын Баткен облусунда 1996-жылы туулган жараны экени аныкталган. Милициянын маалыматына ылайык, ал жетим чоңойгон. Кыргызстанда жүргөндө жарандык никеде жашаган, ошондой эле, жергиликтүү психиатр дарыгердин каттоосунда турган жана буга чейин Ош облусунда дарыланган. 2014-жылы ал Екатеринбург шаарында жашап жүрүп, декабрь айында үйдөн чыгып кеткен боюнча жоголуп кеткен.
Учурда аны издөө иштерин ИИМдин өкүлүчүлүгү Москвадагы кыргыз диаспоралары жана Екатеринбургдагы консулдук кызматы менен биргеликте жүргүзүүдө. Ошондой эле, жабыр тарткан кыз Кыргызстанда да изделүүдө.
