БИШКЕК, 19-окт. — Sputnik. Кыргызстандагы имамдардын 70 пайызга жакыны атайын диний билимге ээ эмес, ал эми кээ бир имамдар диний-экстремисттик уюмдардын идеясын колдоп, элди радикалдуулукка үндөгөн фактылар бар деп билдирди ИИМдин 10-Башкармалыгы.
Муфтияттын маалыматында, Кыргызстан аймагы боюнча иштеп жаткан 2 640 мечиттин 2014ү каттоодон өткөн. Ал эми имамдардын саны 2300гө чукулдап барат.
Алардын бири — республикадагы мечиттердин имамдарын окутуу саамалыгы. Бул иштерди жүргүзүп жаткан "Ыйман" диний маданиятты өнүктүрүү фондунун" жетекчиси Нуржигит Кадырбековго кайрылганыбызда, ал имамдарды окутуу зарыл экендигин мезгил өзү көрсөтүп жатканын айтты.
Имамдарга билим берүү боюнча долбоор 2015-жылдын 3-августунда башталган.
"Имамдар үчүн иштелип чыккан эки жумалык атайын окуу программасы башкача талап менен болууда. Диний предметтерден сырткары, светтик билимдер боюнча, дин чөйрөсүндөгү мамлекеттик саясатка байланышкан саьбактарды киргиздик. Андан сырткары, имамдарга өзгөчө кырдаалдарда иш алып баруу, жаңы IT технологиясы, тайм-менеджмент, мечиттерде уюштуруучулук иштерин жүргүзүү үйрөтүлүүдө", — деди Кадырбеков.
Анын айтымында, имамдар окутуудан кийин кадимкидей экзамен тапшырат, өтпөй калса, кайрадан окуп, даярданып сынакка экинчи ирет кирет.
"Бул өтө олуттуу маселе. Имамдарыбыз руханий лидер болуп жаткандан кийин, эл алардан пикир сурап, кеңешип жаткан соң, элге акыл айтканга, багыт бергенге илим-билими жетиштүү болушу керек", — деди фондунун жетекчиси.
Кыргызстан светтик мамлекет, андыктан диний мекемелерге республикалык бюджеттен каражат каралбайт.
Кадырбеков имамдар, дин кызматкерлерине мотивация иретинде стипендия берилип келе жаткандыгын айтты.
Анын маалыматында "Ыйман" фондунан 800дөн ашуун дин кызматкерлери, муфтийден тарта айылдагы имамдарга чейин стипендия алат.
Ал эми имамдарга сабактарды Кыргызстан Мусулмандар Дин башкармалыгынын муфтийинен тарта, теолог, тилчи, Өзгөчө кырдаалдар министрлигинин адистери өтүүдө. Кадырбеков бул иштин өңүтү системалуу түргө өткөндүгүн белгиледи. Ар бир семинардан кийин кетирген кемчиликтерди талкуулап турушарын айтты.
Кадырбековдун айтымында, учурда өлкө боюнча алты жүзгө жакын имамдар окутуудан өткөн. Фонддун жетекчиси окутуулар жыл аягына чейин улана берерин кошумчалады.
