Япониянын премьери Синдзо Абэ Борбор Азияны 50 инвестор менен кыдырат

БИШКЕК, 21-окт — Sputnik. Япониянын премьер-министри Борбор Азияны кыдырып, анын алкагында 50 инвестор менен Кыргызстанга да келе турганын Япониянын Nikkei Asian Review басылмасы жазып чыкты.

Япон өкмөт башчысы Борбор Азияга болгон иш сапарында 22-октябрдан 28-октябрга чейин Кыргызстан, Тажикстан, Түркмөнстан жана Өзбекстан мамлекеттерин кыдырары пландалууда. Буга чейин Синдзо Абэ Борбор Азия мамлекеттерин август айында кыдырууну пландаган, бирок иши көп болгондуктан, иш сапары октябрь айына жылдырылган.

Sputnik агенттигине КР өкмөтүнөн билдиргендей, Абэ Кыргызстанга болжол менен 26-октябрда келет. Япониянын элчилиги учурда даярдыктар жүрүп жатканын белгилеп, бирок премьер-министрдин келе турган күнүн так айтышкан жок. 

Иш сапары учурунда Япониянын премьер-министри Борбор Азия мамлекеттеринин башчылары менен аймактагы коопсуздукту сактоо, өлкөнүн экономикасын өнүктүрүү, жеке инвестицияларды тартуу маселелерин талкуулайт. Япония ошондой эле бул аймактагы мамлекеттер менен байланышты чыңдап, нефть, жаратылыш газын жана уранды туруктуу алып келүүнү камсыздай турганына ишеним артат. Андан сырткары, Япониянын бир катар компаниялары тыгыз кызматташуу жаатында келишимдерди түзөрүн Nikkei Asian Review басылмасы белгилейт.

Акыркы жолу Абэ ишкерлер менен Жакынкы Чыгышка январь айында иш сапары менен барган.

Бул иш сапары менен Синдзо Абэ Борбор Азия мамлекеттерине биринчи жолу келип жатат. 2006-жылы ал убактагы япон өкмөт башчысы Дзюнъитиро Коидзуми келген. 

Буга чейин күн чыгыш өлкөсүнө Алмазбек Атамбаев баштаган кыргыз делегациясы 2013-жылы барган.