БИШКЕК, 1-дек. — Sputnik. Түркиянын президенти Режеп Тайып Эрдоган, Анкара мунайды "Ислам мамлекетинен" сатып алып жатканы далилденсе, өз кызматынан кетүүгө даяр экенин айтты.
"Түркия мунайды ИМден алып жатат деген айып орунсуз жана мындайды айтуу бузукулук. Бул сыяктуу сөздөрдү жөн гана айткан болбойт, ага далил керек. Эгер андай документтер болсо, көрсөтүшсүн. Мындай факт далилдене турган болсо, мен бул ордумда калбайм", — деди Эрдоган журналисттерге Парижде өткөн климаттык конференция учурунда.
Ошондой эле Эрдоган АКШнын маалыматы боюнча, Россия менен Сириянын жараны Жорж Хасвани мунайды ИМден сатып алып, Дамаскка сатып алууда деп айтып, бирок эч далил келтирген жок.
"Американын маалыматына ылайык, ИМден мунайды сатып алып жаткандардын бири — Россия менен Сириянын жараны Жорж Хасвани. Бул адам аны кайра Сирияга сатканы баарына белгилүү. Биринчи ушуну териштирип, жооп берип алышсын", — деди түрк башчысы.
Россия тарап Хасвани РФтин жарандыгына ээ экендиги жөнүндө, же башка комментарий берген жок. АКШ да мурдатан мындай маалыматты Россияга бергендигин кабарлаган эмес.
Россиянын Су-24 учагы Сириянын үстүндө учуп бара жаткан жеринен Түркиянын F-16 учагы менен түрк чек арасынан төрт чакырым аралыкта атып түшүрүлгөн. Россия президенти Владимир Путин муну "террористтерди жактоочулардын аркадан урган соккусу" деп атаган эле.
Россиянын колундагы маалыматтар
Террористтердин көзөмөлүндөгү кен жайларынан алынган мунай ири көлөмдө Түркияга келип түшөрүн тастыктоочу кошумча маалыматтар алынганын Россиянын президенти Путин буга чейин билдирген эле.
"Мунайды Түркиянын аймагындагы танкерлерге жүктөп кетүүчү портторго жеткирүүчү дал ошол жолдордун коопсуздугун камсыз кылуу үчүн биздин учакты атып түшүрүүнү чечишкен деп айтууга бизде толук негиз бар", — деген пикирин Россиянын президенти Францияда климат боюнча өтүп жаткан конференцияда билдирди.
