БИШКЕК, 16-дек. — Sputnik. Улуттук статистикалык комитети борбор калаанын тургундары тамак-ашка канча акча корото тургандыктарын эсептеп чыкты. Sputnik агенттиги эң көп сатып алынуучу азык-түлүктөрдүн рейтингин түздү.
- Ун, нан азыктары. Тамак-аштын бул түрүнө бишкектиктер жылына 15 миллиард сом жумшайт. Баса, Баткен облусунда биринчи орунда эт турса, Ысык-Көл облусунда ичимдик турат.
- Ичимдиктер. Жылына аракка, сырага жана виного 9 миллиард сом кетет.
- Эт жана эт азыктары. Бишкектиктер уйдун жана койдун этине жыл сайын 4 миллиард коротушат.
Шекер. Борбор калаанын тургундары бул таттуу азыкка 2,7 миллиард сом сарпташты. Баса, таттууну жакшы көргөндөр Нарын облусунда баарынан аз — ал жакта жылына шекерди 40 миллион сомго гана сатып алышат. Бул акчага 727 тонна шекер келет. Бул бир адамга жылына болгону үч гана килограммдан тиет.
Кондитердик азыктар. Бишкектиктердин момпосуй-шоколадга жумшаган акчасы бир жылда 2,3 миллиард сомду түзөт.
Мөмө-жемиштер. Борбор калаанын тургундары 1,5 миллиардга витаминдүү азыктарды сатып алышты. Баса, бул жагынан нарындыктар зыкымыраак келет экен — болгону 15 миллион сом коротушкан.
Сүт жана сүт азыктары 1,4 миллиард сомго турду. Баса, Чүй облусунун тургундары сүткө 2,5 эсе көп жумшашат.
Өсүмдүк майы — жылына 1,2 миллиард сом. Бул бир литрлик 11 миң бөтөлкөгө барабар.
Каймак-май. Буга бишкектиктер бир миллиард сом сарпташкан.
Жашылчалар — 757 миллион. Бирок пайыздык жагынан алганда сабизге, помидорго жана бадыраңга Ош облусунун тургундары баарынан көп акча коротушкан.
