БИШКЕК, 5-фев. — Sputnik. Дыйканчылыкта жаңы ыкмаларды колдонуу менен түшүмдүүлүктү арттыртууга мезгил жеткенин премьер-министр Темир Сариев Араван районундагы Тепе-Коргон айылындагы күнөсканалар менен таанышуу учурунда билдирди.
Өкмөт башчы бир күндүк иш сапары менен Ош облусунда жүрөт. Анын айтымында, Араван районунун климаттык шарты районго күнөскана саны боюнча өлкөдө алдыңкы орунга чыгууга мүмкүнчүлүк берет.
"Буга бардык мүмкүнчүлүк бар. Күнөскананы куруу менен түшүмдүүлүктү көбөйтүп, айылдагы элди жумуш менен камсыз кыла алабыз", — деди Сариев.
Ошондой эле премьер-министр айылдын тургундары менен баарлашып, көйгөйлөрүн укту. Алар район аймагындагы пайдаланылбаган жерлерди ижарага берүү маселесин көтөрдү. Сариев жергиликтүү бийлик башчыларына пайдаланылбай турган жерлерди дыйкандарга узак мөөнөткө ижарага берүүнүн жолдорун иштеп чыгууну тапшырды.
