БИШКЕК, 9-мар. — Sputnik. 9-мартка карата 116 миңден ашык салык төлөөчү киреше боюнча Бирдиктүү декларацияны тапшырганын Мамлекеттик салык кызматы билдирди.
Декларация тапшыруу өнөктүгү 2016-жылдын 1-январында башталган. Эскерте кетсек, ушул жылдын 1-мартында юридикалык жактар үчүн декларациялык кампаниянын биринчи этабы аяктады.
Салык төлөгөндөрдүн ичинен 35 миң 431и — юридикалык жактар, 45 миң 343ү — жеке ишкерлер, 30 миң 87си — жеке жактар жана 5 миң 450сү — мамлекеттик кызматкерлер. Жеке жактар1-апрелге чейин 2015-жылы алынган кирешелер же жер тилкелери жана мүлк объектилери, экономикалык ишмердиктери тууралуу жана башка маалыматтар жөнүндө салык органдарына отчет берүүлөрү керек.
2015-жылдын жыйынтыгы менен Бирдиктүү салык декларациясын 366 миң 279 салык төлөөчү тапшырган. Бул 2014-жылкыга караганда 22 миңге көп көрсөткүч. Бүгүнкү күнгө карата салык төлөөчүлөрдүн 31,75 пайызы декларация тапшырды.
Салык кызматы декларацияны өз убагында тапшырбагандарга административдик айып салынарын белгилейт.
