БИШКЕК, 28-апр. — Sputnik. Сузак районундагы Алмалуу-Булак айылында 27-апрелде кеч курун жер көчкү жүрүп, бир окуучуну басып калган. Экинчисин айылдаштары жер көчкүдөн сууруп качканга жетишкен.
Окуяга күбө болуп, бир баланы аман алып калып, экинчисин сактай албай калган Алмалуу-Булактыктар жана тирүү калган баланын энеси менен Sputnik Кыргызстан байланышып, окуянын чоо-жайынан кабар алды.
Жер көчкүдөн уулунун аман калганына 36 жаштагы Нургүл кудайга тобо кылып, бирок, эстеген сайын жүрөгү козголуп жатканын айтып берди.
Уулум катуу коркуп калыптыр
Кечээ айылдыктар сактап калган тун уулум — Мирбек Айталиев. Ошол учурларда кырсык болгон жерде Эрлан Урматбек уулу экөө ойноп жүргөн экен дейт апасы.
"Ошол жерде абысындар бар, "чоң апа, жардамга" деп кыйкырып ыйлаганы угулган. Ал баланын добушу чыгып жатат, чуркагыла дептир. Көргөндөр айтышты. Менин баламдын башы, бир колу эле чыгып, башка жагы көчкүнүн алдында калган экен", — деп айтып берди Нургүл.
"Коркуп калыптыр. Ооруган жерлерин азыр айта албай жатат. Эртең менен кардиология бөлүмүнө алып барып текшертсек, Кудайга шүгүр, жакшы дешти. Бел жагынан омурткасынын бир жери ооруп жатканын айтты, бир аз шишип калыптыр. Буттары, тизесинен ылдый жагы сыйрылган. Уулумду жер көчкү эки-үч ороп кеткен экен", — деди ал.
Айылдаштар ажалга арачы болгондо
Баланы куткарып калгандардын бири Кубаныч Сейитов жана Нурлан Бөлөкбаевди сөзгө тарттык.
26 жаштагы Сейитов баланы кантип сактап калганынын айтып берди.
"Кошунам "неберемди калып кетти" деп кыйкырды. Атып турдук. Кандай жеткенибизди билбейм, чуркап эле бардык. Мирбектин денесинин бөлүгү чыгып калыптыр. Баарылап эле жабылдык. Кимибиз тартып чыкканыбызды да билбей калдым. Өзүңдү жоготуп коёт экенсиң", — деди Кубаныч.
Эрландын топурак алдында калганын Мирбек чырылдап айтып берген.
"Жаңы эле топурак алдынан чыккан уулум "шеригим калып калды, ушул жерлерде, акелер ушул жерлерде" деп чырылдаптыр. Куткарабыз деген балдардын айтканына караганда, чоң кесек келип, Эрланды басып калган экен", — деди Нургүл.
"Анан эле экинчи бала каякта деп кайсалап калдык. Кыйкырсак, үн чыккандай болду, ал жерде тырмалап жиберсек, башы менен колу көрүндү. Тирүү экен!!! Тырмалап баштасак эле, бир учурда "качкыла эле, качкыла, дагы келе жатат" деп чурулдап калышты. Качтык. Экинчиси келип кайра басып калды… Бир канча метр чуркап барып, кичине бурулуп аркамды карасам, бопбоз чаңдан башка эч нерсе көргөн жокмун…", — деди маектешибиз.
Өлүм менен өмүрдүн ортосундагы 2-3 мүнөт…
Биздин маектеш ошол кездеги өлүм менен өмүрдүн көз ирмемдик сүйүнүчү менен жанды жеп жиберген өкүнүчүн төмөнкүчө айтып берди.
"Мирбекти тирүү сууруп чыкканда сүйүнүп эле кеттик. Экинчисинде кол менен топурак чапчып, тырмалап жатып, Эрланды денесинин бөлүгүн көргөндө сүйүндүк эле, анан эле жанагындай жагдай болуп кетти … Уюлгуган топурактын чекесинде шылкыйып туруп калдык", — деп эскерди ал.
Сейитов азыр же кубанаарын же сүйүнөрүн билбей турат. Көңүл жылытканы айылдаштары менен тополоң-тоз болгон жер көчкүдөн 14 жаштагы Мирбекти сууруп чыкса, дагы бир өспүрүм Эрланды кол сунуп баратып, сактай албай калганын айтат.
Бүгүн маркум Эрландын сөөгү табылды. Бул туурасында айтып берген Нурлан Бөлөкбаев, топурак басып калган баланын сөөгү дээрлик ордунан жылбаганын билдирди. Баланын өзүн сактай албаганы менен сөөгүн тапканга көмөк көрсөтүптүр.
"Кечээги жерден болгону алдыны көздөй 3-4 метр жерге жылыптыр. Өзгөчө кырдаалдар министрлигинин адистерине болжолдоп ошол жерди көрсөтүп берсем, казганда эле чыкты", — деди Бөлөкбаев.
Бүгүн министрликтин кызматкерлери маркум Эрландын сөөгүн ата-энесине беришти. Ал эми айылдаштары сактап калган Мирбекти медициналык текшерүүлөр, дарылануу күтүп турат…
Мирбектин өмүрүн сактап калгандар
Алар 42 жаштагы Нурлан Бөлөкбаев, 26 жаштагы Кубаныч Сейитов. Андан сырткары Сок-Таш айылындагы Абдраимов атындагы мектептин окуучулары:
Дөөлөт Казиев, Нурмамат уулу Улук, Улан Төрөканов, Эрмамат Амиракулов, Калыбай уулу Арген, Сайдилла уулу Тынчтык, Азирет Атчабаров, Бегалы уулу Бекмамат, Шумкарбек Мөндөев. Бул балдар өздөрүнөн 1-2 жаш кичүү айылдашын куткарып калышты.
