БИШКЕК, 29-апр. — Sputnik. Сузак районундагы Алмалуу-Булак айылындагы Матиев атындагы мектептин 150 окуучуcу жана жер көчкү кооптуулугу сакталган тилкедеги турак жайларда жашагандар эвакуацияланды. Бул туурасында ӨКМдин маалымат кызматы кабарлады.
"Алмалуу-Булак айылындагы 73 үй-бүлө мүчөсү коркунучтуу жерде жайгашкандыгына байланыштуу эвакуцияланып, коопсуз жакка чыгарылды",— деп билдирди маалымат кызматы.
Аталган аймакта жер көчкү улам жүрүп, кооптуулук азыркыга чейин сакталууда. Буга чейин бир нече ирет жер көчкөн. Акыркы жолу кечээ, 28-апрелде Кызыл-Туу айыл аймагынын Үч-Чат жайлоосунда саат 11:00 чамасында 2,5 миллион куб метрге чукул жер көчкү жүрүп, бир жеңил автоунааны басып калган.
"ӨКМдин Кризистик кырдаалдарда башкаруу борборунун алты адамдан турган ыкчам тобу Кызыл-Туу айыл аймагынын Үч-Чат жайлоосунан түшкөн жер көчкүнүн токтогон жеринде байланыш каражаттарын орнотуп (видеоконференция), байланышка чыгуу аракеттерин жүргүзүп жатат", — деп ӨКМ маалымдады.
Апрель айынын аягында Сузак районундагы бир катар аймактарындагы жер көчкүнүн кесепетинен 16 жаштагы бала каза болгон. Андан сырткары, бир нече үй топурак алдында калган.
