Сузактагы жер көчкү алааматында баланы сактап калгандар сыйланды

БИШКЕК, 9-май— Sputnik. Өзгөчө кырдаалдар министри Кубатбек Бороновдун буйругу менен адамдарды куткарууда өз өмүрүн тобокелге салган Арген Тургунбаев менен Нурмамат уулу Улугбек "Каарман" медалы менен сыйланды. Бул туурасында Өзгөчө кырдаалдар министрлигинин маалымат кызматы кабарлады.

Сузак районундагы Алмалуу-Булак айылында 27-апрелде кеч курун жер көчкү жүрүп, бир окуучуну басып калган. Экинчисин айылдаштары жер көчкүдөн сууруп качканга жетишкен.

Турганбаевдин айтымында, мал сарайды оңдоп коюш үчүн алар өөнгө түшкөн. 

"Мал чыгып кетпесин деп, сарайдын кыйшайып калган жерин тосуш үчүн барган элек. Мен өзүмчө, ал эми Мирбек менен Эрлан берки тарабынан кетишкен. Бир учурда эле гүүлдөгөн үн чыгып, жер солк дей түштү. Мен алардан бөлүнүп калып, жердин көчүп келе жатканын көрүп, өйдөнү көздөй, тоо таяна, тамдар тарапка чуркадым", — деп айтып берди Турганбаев. 

Ал алгач жеңесин коркунуч жок жерге жеткирип, кошунасы Улук экөө жардамга чакырган үндү укканда төмөн карай чуркашкан. 

"Үйдө жеңем бар болучу, аны коопсуз жайга алып чыктым. Биз өйдө чыгып калган учурда апам жер көчкөн тараптан бирөөлөр кыйкырып жатканын айтты. Аны мен да угуп, дароо чуркадым эле, мага кошулуп Улук да чуркады. Белинен өйдө чыгып жаткан Мирбекти көрүп, дароо кол менен тырмалап каза баштадык. Алып чыкканда коркуп калыптыр, мен дароо Эрланды сурасам, бир аз эле артта калганын айтты. Улукбек ал көрсөткөн жерди тырмалай баштаганда, алгач чачы көрүндү, бир колун казганга жетишкенде… аркы дөңсөөдө тургандар жер көчүп келе жатат деп кыйкырышты. Жакындап келе жаткан топурак аралашкан көчкүнү көрүп калдым, дароо качтык… араң кутулдук",— деп эскерди Арген. 

Ал учурда корккон жоксуңарбы деген суроого, "балдарды сактап калсак деген эле бир ой келди. Мирбекти тартып чыгардык, ал эми тилекке каршы, Эрлан кала берди…",— деди Улугбек.

ӨКМ жана жергиликтүү жашоочулар жер көчкүнүн алдында калган Эрландын сөөгүн эртеси, 28-апрелде таап, ата-энесине берген.