БИШКЕК, 15-авг. — Sputnik. Улуттук банк бүгүнтөн тарта "Эгемен Кыргыз Республикасына 25 жыл" жана "Дүйнөлүк көчмөндөр оюндары" коллекциялык күмүш монеталарынын жүгүртүүгө чыгарат. Бул туурасында аталган мекеменин маалымат кызматынан кабарлашты.
"Тыйындар Улуттук банк тарабынан кыргыз мамлекеттүүлүгүнүн калыптанышына байланыштуу маанилүү тарыхый окуяларды кеңири таанытуу жана өнүктүрүү максатында чыгарылган", — деп билдирди маалымат кызматы.
"Эгемен Кыргыз Республикасына 25 жыл" монетасынын алдыңкы бетине түшүрүлгөн боз үйдүн түндүгү ортосунда туш-тушка чачырап тийген күн нурунун алкагында канатын кере жайган бүркүттүн элеси кыргыз мамлекетинин жана элдердин эркиндигин даңазалайт. Монетанын арт жагында "25" саны жайгашкан. Монетанын кырында тегерете "Эгемен Кыргыз Республикасына 25 жыл/ Независимой Кыргызской Республике — 25 лет" жазуулары түшүрүлгөн. Анын салмагы 31,10 граммды түзөт.
Маалымат кызматы 10 сомдук монеталар Кыргызстандын аймагында расмий төлөм каражаты статусуна ээ экендигин билдирди. Ар бир монета акрил капсуласына жайгаштырылып, ага сертификат тиркелип өзүнчө кутучага салынган.
