БИШКЕК, 15-сен. — Sputnik. Оор атлетчи Иззат Артыковго 19-сентябрда атайын белек тапшырыла тургандыгын "Аю" компаниясынын вице-президенти Балбак Түлөбаев Sputnik Кыргызстан агенттигине кабарлады.
Түлөбаев эмне белек экени азырынча сыр бойдон калтырууну туура көрүп жаткандыгын айтты.
"Абдан чоң белек ыйгарылат. Ал эмне экени азырынча сюрприз болуп турсун. Четин чыгарайын, белектин баасы беш миллион сомго жакын", — деп билдирди Түлөбаев.
Ал билдиргендей белек 19-сентябрда саат 11.30да тапшырылат.
Sputnik Кыргызстан агенттиги Иззаттын өзү менен байланышканда ал бул тууралуу азырынча уга электигин айтты.
"Мага эч ким чала элек. Эмне белек экени мага да кызык болуп жатат. Эгер чындык болсо абдан кубанычтамын", — деди Артыков.
Эске салсак, жайкы Олимпиададан Кыргызстандан барган спортчулардын ичинен жалгыз оор атлетчи Иззат Артыков коло медаль алган. Бирок WADA канынан тыюу салынган стрихнин каражаты табылды деген кине менен аны байгесинен ажыратып койгон.
