Иса Өмүркулов жаңы коалиция жана өкмөттүн курамы тууралуу өз оюн айтты

БИШКЕК, 27-окт.— Sputnik. Исмаил Мамытов. Жогорку Кеңеште көпчүлүк коалициясын куроо боюнча сүйлөшүүлөр жүрүүдө. Бул тууралуу КСДП фракциясынын лидери Иса Өмүркулов Sputnik Кыргызстан агенттигине билдирди.

Эске сала кетсек, дүйшөмбү күнү КСДП фракциясы расмий түрдө коалициядан чыга тургандыгын билдирген. Аталган фракция көпчүлүк коалициядагы акаевчи, бакиевчи делгендер жана мародерчулукка шектелгендер менен бир боло албай тургандыгын айткан. 

Ал эми коалиция таратылышы тууралуу расмий айтылган соң жаңы коалиция куроо мандатын президент КСДП фракциясына берген. 

"Көпчүлүк коалициясын куроо үчүн мандатты кечээ күнү эле алдык. Мыйзам боюнча 15 күн ичинде коалицияны курашыбыз керек. Бирок биз батыраак куроого аракет кылабыз. Анткени өкмөт иштеши керек. Ошого байланыштуу бүгүнтөн баштап сүйлөшүүлөр жүрүүдө. Алдын ала кимдер кирээрин айтуу кыйын. Жолугушуудан соң жалпы кеңешип туруп чечебиз", — деди Өмүркулов. 

Эл өкүлү өкмөткө нааразычылык жок экенин билдирди.

"Өкмөткө нааразычылык жок. Бул ирет коалиция ичиндеги пикир келишпестиктерден улам тарады. Өкмөткө доомат жок болгондуктан премьер-министр кызматта калышы толук мүмкүн", — деди фракция лидери.

Белгилей кетсек, айрым серепчилер көпчүлүк коалициясына КСДП, "Кыргызстан" жана "Республика — Ата-Журт" кирерин айтышкан.

Буга чейинки көпчүлүк коалициясына КСДП, "Өнүгүү — Прогресс", "Кыргызстан", "Ата Мекен" фракциялары кирип, лидери болуп Канат Исаев дайындалган. Ал эми КСДП фракциясынын лидери Иса Өмүркулов бир канча ирет көз караштар дал келбесе, "Өнүгүү — Прогресс" менен "Ата Мекенди" коалициядан чыгып кетүүгө чакырган.