БИШКЕК, 31-окт. — Sputnik. Ички иштер министрлиги Бишкекте 2-3-ноябрь күндөрү жол кыймылына чектөө киргизиле турган көчөлөрдүн тизмесин жарыялады.
Эскерте кетсек, 2-ноябрда Кыргызстанга расмий сапар менен Кытай Мамлекеттик кеңешинин премьер-министри Ли Кэцян келсе, эртеси, 3-ноябрь күнү ШКУ өкмөт башчылар кеңешинин жыйыны өтөт.
31-октябрдан баштап 3-ноябрга чейин ички иштер органдары күчөтүлгөн тартипте иш алып барат. Кыргызстандагы коомдук-саясий абалды эске алуу менен тартипти көзөмөлдөөгө милициянын 3 миң кызматкери тартылууда.
Иш-чаралардан улам төмөнкү көчөлөрдө жол кыймылына чектөө киргизилет:
- "Манас" аэропорту — Бишкек трассасы;
- Фучик көчөсү — шаардын чегинен баштап Жибек Жолу проспектисине чейин;
- Жибек Жолу проспектиси — Фучикетен Манас проспектисине чейин;
- Айтматов проспектисинен мамлекеттик резиденцияга чейин;
- Чүй проспектиси — Манастан Абдрахманов көчөсүнө чейин;
- Абдрахманов көчөсү — Чүй проспектисинен Абдымомуновго чейин;
- Масалиев көчөсү (Түштүк магистраль) — Айтматов проспектисинен Сухэ-Батор көчөсүнө чейин.
