Шаршемби күнү саат 06:50дө Дэн Сяопин көчөсү менен Патрис Лумумба көчөлөрүнүн кесилишинде айдоочу жөө аялды коюп кетип, токтоп койбостон из жашырып кеткен.
Ал эми кечке жуук Кайгуул милициясы кылмышка шектүү катары 25 жаштагы калаа тургуну кармалгандыгын билдирген.
"Адамды сүзөрүм менен аябай коркуп кетип, токтогон жокмун. Ошол күнү кечинде окуяны жаңылыктардан окуп, туугандарыма бардым да баарын айтып бердим. Анан милицияга өзүм келүүнү туура көрдүм. Күнөөмдү билип турам", — деди айыпталуучу.
Анткен менен Кайгуул милициясынын кызматкерлери шектүү өзү келген жок деген ойдо.
"Биз базанын жардамы менен унаа катталган үйгө бардык. Ошондуктан айдоочунун туугандары кысым кылып шектүүнү алып келишти деп ойлойм", — деди Кайгуул милициясынын Тергөө бөлүмүнүн башчысы Ажыбек Майназаров.
Аталган факт боюнча кылмыш иши козголуп, тергөө амалдары башталды.
