БИШКЕК, 22-фев. — Sputnik. Бишкекте жол кырсыгына себепкер болгон Россия элчилигинин биринчи катчысы Виктор Пухов Кыргызстандан чыгып кеткенин дипломатиялык өкүлчүлүктүн маалымат катчысы Дарья Пахомова Sputnik Кыргызстан агенттигине билдирди.
Пахомованын айтымында, Пухов Россияга учуп кетти.
"Ал Кыргызстандан канча убакытка чыгып кеткени азырынча белгисиз", — деди маалымат катчы.
Ал ошондой эле элчилик жол кырсыгынан каза болгон айдоочунун аялы менен байланышканын кошумчалады.
"Жубайы өзүнө келгенден кийин биз менен байланышарын айтты. Биз кичине күтө турабыз, эгер ал байланышка чыкпаса кайтадан сүйлөшүүгө аракет кылабыз", — деди ал.
Пуховго карата Кылмыш жаза кодексинин 281-беренесинин 2-бөлүгү "Транспорт каражаттарынын кыймылынын жана аларды пайдалануунун коопсуздук эрежелерин бузуу" менен кылмыш иши козголгон.
