БИШКЕК, 4-май — Sputnik. Ош облусунун Араван районунда беткапчан бейтааныш үч киши акча алмаштыруу жайынын кызматкерин тоноого аракет кылганын облустук ички иштер башкармалыгынын маалымат кызматы билдирди.
Окуя 30-апрелде эртең менен болгон. Акча алмаштыруу жайынын 46 жаштагы кызматкери өз автоунаасы менен башка айылга кетип баратканда, жолун башка машина тороп токтогон. Андан беткапчан үч киши чыгып, тапанча менен коркутуп акча талап кылган. Анын жанынан эч кандай акча таппагандан кийин өздөрүнүн жолуна түшкөн.
"Алдын ала маалымат боюнча шектелип кармалган жарандар акча алмаштыруу жайында иштеген киши акча алып бара жатат деген ой менен аны тоноого аракет кылышкан. Кылмыш жасагандан кийин алар бөлүнүп, түрдүү жерлерде жашынууга аракеттенишкен. Экөө Ош облусунан кармалса, үчүнчү жаран Жалал-Абадга кетип калган. Ал таксиге отуруп жаткан учурда кармалды", — деп айтылат маалыматта.
Тинтүү учурунда алардын жанынан эки огу менен мергенчинин мылтыгы, беткап жана колкап табылган. Ошондой эле машинанын мамлекеттик номери чыккан.
Аталган факты боюнча "Каракчылык" беренесинин негизинде кылмыш иши козголду. Милиция алардын башка кылмыш иштерине тиешесинин бар-жогун тактап жатат.
