БИШКЕК, 6-май — Sputnik. Бишкек ШИИБдин Кайгуул милициясы жөө адамды коюп кетти деп шектелген айдоочуну кармады. Бул тууралуу аталган мекеменин маалымат кызматы билдирди.
Ага ылайык, ишембиге караган түнү 6-майда болжол менен саат 01:00дөр чамасында Травматология жана ортопедия илим изилдөө борборунан милицияга кабар келген. Анда Медеров жана Юнусалиев көчөлөрүнүн кесилишинен айдоочу жөө адамды коюп кеткени айтылган.
Ооруканага дароо келген милиция кызматкери башынан жаракат алган жаран кайра жандандыруу бөлүмүндө экенин билген. Дарыгерлер аны ким алып келгенин так айта алышкан эмес. Бирок милиция кызматкери оорукананын коридорунда тынчсызданып жаткан кишилерди байкап, суроо салса алар жол кырсыгына кабылган жай адамдын абалын билүү үчүн келгендерин айтышкан.
Кийинчерээк 12-кичирайондогу "Панорама" жактан маңдайкы терезеси талкаланган, мамлекеттик номери жок Toyota Wish үлгүсүндөгү автоунаа табылган. Жыйынтыгында жол кырсыгына күбө болгон үч жаран дал ушул машина жай адамды коюп кеткенин айтышып, рулда отурган киши жабыркаган жарандын абалын билүү үчүн таанышын ооруканага чакырганы аныкталган.
"Түнкү саат 04:00дөр чамасында шектүү жаран жасагандарын мойнуна алып, таанышынан машинаны катып коюуну суранганын айткан", — деп Кайгуул милициясынан билдиришти.
Шек жараткан 38 жаштагы киши кармалып, милиция кылмыш ишин козгоо үчүн материалдарды даярдап жатат.
