БИШКЕК, 12-май — Sputnik. Бишкек — Нарын — Торугарт мамлекеттик трассасы өткөн Оттук айылында автоунаа баланы тебелеп кеткенден кийин гана элдин суранычы орундала баштады. Кечээ аталган жолдон тогуз жашар баланы маршруттук такси тебелеп кеткенден кийин эл жол тосуп, бүгүн ылдамдыкты азайтуучу жол тоскоолдуктары чекесинен орнотулууда. Бул туурасында аталган айыл өкмөтүнүн жетекчиси Автандил Молдосалиев Sputnik Кыргызстан агенттигине кабарлады.
Аталган айыл Нарын районуна карайт. Айыл өкмөтүнүн жетекчисинин айтымында, Оттук айылы аркылуу өткөн Бишкек — Нарын — Торугарт мамлекеттик трассасында кырсык көп катталат. Анын бир мисалы бир күн мурда болгон окуя.
"Жол кырсыгы көп катталып, мал-жаныбыз зыянга учурап келет. Мал эч нерсе эмес, ал тургай адам өмүрүн алган учурлар көбөйүп кетти. Автоунаалар айылдын ичин катуу ылдамдык менен аралап өтөт", — деди Молдосалиев.
Жергиликтүү бийликтин өкүлү бул маселени чечүү боюнча тиешелүү тараптарга, анын ичинен Транспорт министрлигине көп ирет кайрылуу болгонун айтты.
Кырсык болгондон кийин аталган аймакка облустук бийликтин, Нарын облустук ички иштер башкармалыгынын жетекчиси, Кайгуул милициясынын аймактык жетекчилери келген. Эл бүгүн кайрадан чогулуп аларга канча убакыттан бери какшап, суранып келе жаткан "ылдамдыкты азайтуучу жол тоскоолдуктарды орнотуп бербесе, кайрадан жолду бууйбуз" деген шарт койгон.
Жергиликтүү бийликтин өкүлү учурда аталган дөңсөөлөр орнотула баштагандыгын кошумчалады.
Кырсык болгондон кийин чечилген маселе…
Нарын ОИИБдин Кайгуул милиция бөлүмүнүн жетекчисинин орун басары Тилек Оторов 59 жаштагы айдоочу азыр убактылуу кармоо жайында экендигин, ишти учурда облустук прокуратура карап жаткандыгын айтты.
"Караколдон келе жаткан кичи автобустун айдоочусу велосипед айдап чыга калган өспүрүмдү койдуруп алган. Бала жандандыруу бөлүмүнө жетпей каза тапкан. Ишти Нарын райондук тергөө бөлүмү иликтеп жатат. Автоунаа айып короого токтотулуп, айдоочу 48 саатка убактылуу кармоо жайына киргизилди", — деди Оторов.
"Нарын ИИБдин жетекчиси Нурлан Сарчаев тиешелүү министрликтер менен сүйлөшүп, эл талап кылган жол тоскоолдуктарын коюп берүү боюнча уруксат алып, бүгүн алар чекесинин коюла баштады",— деди Оторов.
Азыр Бишкек — Нарын — Торугарт жолун реконструкциялоо боюнча тендерди утуп алган кувейт-кытайлык биргелешкен "Копри/Синохидро" фирмасы ылдамдыкты азайтуучу жол тоскоолдуктарды орнотуп жатат.
